Posted by: Jamilin Sirait | April 19, 2010

Refleksi Jubilate


Renungan tu ari Minggu 25 April 2010

Jubilate: Marolopolop tu Debata ma sandok tano on

Turpuk jamita: Ulaon 15:6-18

–          Bagian ni pardalanan ni apostel Paulus laho mamaritahon barita na uli do turpuk on. Laho mangurupi hita pabagashon pangantusion ringkot do tajaha mamungka sian bindu 9 ima taringot tu hamubaon ni roha ni si Paulus sian silele angka na porsea tu Yesus Kristus gabe apostel, na tangkas mangalehon roha dohot sude ngoluna manghophop barita haluaon i.

–          Diadopi si Paulus do angka hamaolon (rintangan), pardalanan na mansai maol dohot angka perbedaan pangantusion, perdebatan taringot tu hajongjongan ni aturan-aturan ha-Jahudi-on marpardomuan tu ngolu ni halak na rade mangihuthon Jesus. Di deba halak Jahudi, marlangku do aturan ha-Jahudi-on tu sude halak na porsea tu Jesus. Angka penganut ugamo Yunani hian (“kafir”, non-Yahudi) ingkon disunat do asa sah sebagai halak Kristen. Tontu holan salah satu sian aturan ha-Jahudi-on do on, godang do pe angka aturan na asing. Lapatanna, molo marlangku parsunaton i, ingkon marlangku ma nang angka aturan na asing.

–          Ndang ditolopi si Paulus pandapot ni deba halak Jahudi on. Nang pe sian tongatonga ni Israel (pomparan ni si Daud) haroro ni Jesus, ndang gabe merubah status parbangsoon dohot budaya molo naeng siihuthon Ibana. Marasing do proses gabe proselyt dohot gabe siihuthon Jesus. Ganup suku bangso adong do budayana be. Ganup halak na porsea tu Jesus ndang mangilulu gabe suku bangso na asing, ndang mungkin mago identitasna songon sada suku bangso. Alana, ndang di atas dasor aturan ha-Jahudi-on halauon na pinatupa ni Jesus Kristus.  Asi ni roha ni Debata do haluaon i jala dipasahat tu sude bangso, ndang marimbar. Asa na gabe syarat parjolo mangihuthon Jesus ima rade manghaporseai haluaon na pinatupaNa marhite panghophoponNa di silang i.

–          Hombar tu si, ndang tarjalo hita angka pingkiran na mandok: “ala hakristenon i diboan angka missioner na ro sian Eropah manang Barat, gabe agen ni halak Barat ma angka halak Kristen na di Asia.” Deba halak mandok, halak Kristen Asia ima “the Westernized” (yang telah dijadikan menjadi Barat/Eropah). Tatulak do pingkiran na mandok, ia halak Kristen Batak ndang ringkot be mangulahon adat ai nunga ro adat na imbaru na berdasarkan hakristenon. Apostel Paulus mandok: ndang mardiaimbar di si halak Yahudi manang halak Yunani, hatoban manang anak mata…. (Gal.3:28). Lapatanna, molo gabe Kristen hita halak Batak ndang gabe mago identitasna sebagai halak Batak. Tongtong do hita halak Batak, ima suku bangso naung memiliki budaya sian na jolo. Taokui do, ndang ala ni budaya i umbahen na dipalua hita, holan asi ni roha ni Tuhanta sambing do. Alai ndang didok asa tapamago ma budayanta i. Ndang na mandok gabe tumimbo ma budaya sian Barita Nauli. Ingkon tongtong do Barita Nauli parjolo, jala I do dasor (ojahan) ni hakristenon. Alai gabe marguna do budaya laho pahothon dohot patoguhon panjangkononta di haluaon i. Kenyataan, tapangke do hata Batak sahat ro di sadari on jala bagian ni budaya do i. Angka suku bangso na asing pe dipangke do budayana dohot bahasana be. Tutu adong do deba sian angka ulaon adat na so porlu tapartahanhon molo taida maralo tu hata ni Debata. Alai ndang boi mamuramurahu hita mandok, budaya dohot adatta i maralo tu hata ni Debata.   

–          Tangkas do dialo angka apostel na parjolo sikap ni deba halak Jahudi na merendahkan budaya ni angka bangso na asing. Didok angka apostel i ndang ringkot diberlakukan adat ni halak Jahudi tu halak na so Jahudi. Asa molo adong na mandok naung ro adat na imbaru jala mago ma sude adat ni angka suku bangso maralo do i tu pangajarion ni angka apostel na parjolo i. 

–          Boi marolopolop sude bangso ala dijalo Debata do ganup gabe anakkonna na manjalo haluaon i di hajongjonganna (identitas parbangsoonna) be. Tongtong do ingkon ongkuhononta holan asi ni roha ni Debata do umbahen malua hita.  Jala sude halak Kristen ingkon mangokuhon on. Tauji ma muse manguhal umbagas na gabe refleksi ni jamita on.

 

 

 

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Categories

%d bloggers like this: